Цэнтр новых ідэй зладзіў адукацыйны курс, прысвечаны знешняй палітыцы Беларусі: Акадэмію новай беларускай дыпламатыі. Навучанне складалася з афлайн- і анлайн-сесій. Спачатку цягам 17 анлайн-заняткаў удзельнікі вывучалі, як фармавалася і што сабой уяўляе знешняя палітыка Беларусі, а падчас двухдзённай афлайн-сесіі — адпрацоўвалі навыкі, каб прасоўваць беларускую павестку ў міжнародным асяроддзі.

У межах анлайн-праграмы асноўнай мэтай курсу было навучыць акадэмікаў глядзець на свет з фокусам міжнародных стасункаў і дыпламатыі. Таму праграма складалася з лекцый, якія маглі б даць штуршок для далейшага паглыблення ў абазначаныя тэмы.

— Конкурс склаў амаль тры чалавекі на месца, — зазначае каардынатарка адукацыйных праектаў ЦНІ Дар’я Рублеўская. — Ёсць чатыры студэнты і студэнткі, якія не прапусцілі ніводнай анлайн-лекцыі і яшчэ 14 людзей не наведалі да пяці заняткаў. Гэта сведчыць пра актуальную праграму і выдатны адбор матываваных удзельнікаў і ўдзельніц.

Вядома, мы не ставілі перад сабой мэтай замяніць цэлы курс факультэта міжнародных стасункаў БДУ ці паўнавартасную дыпламатычную акадэмію. Мы рабілі гэтую праграму для тых, хто ўжо так і інакш уцягнуты ў новую дыпламатыю і мае патрэбу ўзмацніць сябе ў кірунку. Разуменне дыпламатыі сёння пашырылася, і хацелася б, каб патрэбнымі інструментамі і навыкамі валодалі не толькі акрэдытаваныя дыпламаты, але і ўсе актары, якія працуюць з міжнароднымі стасункамі і адвакацыяй.

Экспертамі і эксперткамі анлайн-часткі сталі людзі, якія маюць непасрэднае дачыненне да тэмаў. У лекцыях яны спалучалі тэорыю са сваім досведам, каб як мага поўна адлюстраваць кантэкст пытанняў: стасункаў Беларусі з рознымі рэгіёнамі і актарамі, пытанні культурнай дыпламатыі і дыяспары, уплыву эканомікі на знешнюю палітыку краіны. Сярод спікераў і спікерак – былы дыпламат Павел Мацукевіч, сацыёлаг Генадзь Коршунаў, спецдакладчыца ў ААН па Беларусі Анаіс Марэн, заснавальнік Цэнтра новых ідэй Рыгор Астапеня. Рыгор адзначае, што для ЦНІ было важна даць людзям веды і навыкі, якія дапамаглі б браць актыўны ўдзел у грамадскім жыцці.

— Патрэбна быць гатовымі скарыстацца будучымі магчымасцямі, якія з’явяцца ў гістарычны момант пераменаў, — кажа ён. — Таму ў нас было дзве вялікія мэты: даць веды, як функцыянуе знешняя палітыка, якое месца Беларусі ў рэгіянальнай палітыцы, якім чынам яна можа развівацца. А таксама — даць людзям навыкі, якія б дапамаглі ім не столькі стаць дыпламатамі ў будучыні, а быць здольнымі ўжо сёння якасна прасоўваць беларускую павестку ў міжнародным асяроддзі. Ці дасягнулі мы мэтаў, пакуль складана сказаць, бо мы цяпер хутчэй частка гэтага працэсу ўзрошчвання элітаў. Але мы далі людзям прыступку, на якую яны маглі б зайсці. Пасля нашага навучання ўдзельнікі пайшлі на стажыроўкі, рэалізуюць уласныя праекты: гэта паказчык, што мы на правільным шляху.

Толькі адзін занятак падчас анлайн-праграмы тычыўся практычных навыкаў: палітычны аглядальнік Арцём Шрайбман правёў майстар-клас па напісанні аналітычных тэкстаў, разабраўшы самыя распаўсюджаныя памылкі. Па водгуках, гэтая частка апынулася для ўдзельнікаў і ўдзельніц адной з самых карысных: у колах міжнародных стасункаў выказваць свае думкі пісьмова не менш важна, чым вусна. Пасля семінару падрыхтавалі ўласныя эсэ, на кожнае з якіх Арцём пакідаў водгук.

— Збольшага я быў нават здзіўлены, наколькі падрыхтаваныя людзі прыйшлі на занятак, — распавёў ён. — Яны задавалі пытанні па справе падчас майстар-класу, прынамсі палова была падрыхтаваная да задання па напісанні тэксту. Былі эсэ больш моцныя і больш слабыя, але гледзячы на якасць тэкстаў, мне не падалося, што я шмат чаму навучыў некаторых удзельніц і ўдзельнікаў. Ва ўсіх з удзельнікаў ёсць база, з якой можна працаваць, проста камусьці трэба больш практыкі, а камусьці — тэорыі. Мне самому былі цікавыя пытанні, якія задаваліся, а калі чытаў эсэ, то ўбачыў новыя ракурсы на праблемы, над якімі разважаў.

Удзельніца курсу Наталля Ількевіч-Юроўская, якая не прапусціла ніводнага анлайн-занятку, адзначае, што частка па напісанні тэкстаў аказалася для яе займальнай. У першую чаргу — абагульненнем простых, на першы погляд, рэчаў.

— Таксама важным было праслухаць аргументаваную лекцыю Кацярыны Барнуковай і пераняць досвед Паўла Мацукевіча, — распавядае яна. — Але думаю, мая наведвальнасць — паказчык цікавасці ўсяго курса, бо мне было цікава даведацца больш пра знешнюю палітыку Беларусі, асабліва з первых вуснаў. Я адчувала давер да экспертаў і экспертак — хаця было б таксама карысна паслухаць іншы бок: тых, хто цяпер працуе знутры краіны. Было заўважна, што курс робяць тыя, хто добра разумее кантэкст сітуацыі. Таму я раю паступаць у Акадэмію альбо тым, хто цяпер шмат працуе з замежнікамі і замежніцамі, альбо тым, хто плануе ў будучыні займацца дыпламатыяй.

Наступны набор на Акадэмію новай беларускай дыпламатыі, якая ладзіцца Цэнтрам новых ідэй у супрацы з Фондам Эберта, распачнецца ў пачатку 2024 году. Сачыце за абвесткамі на нашым сайце.